Na Iddy Juma Mzee

Uislamu ni dini iliyosimama katika misingi ya amani, haki, huruma na kuheshimu uhai wa binadamu. Hata hivyo, katika nyakati mbalimbali, kumekuwa na makundi yanayotumia jina la Uislamu kuhalalisha vitendo vya kigaidi, mauaji ya watu wasio na hatia na kueneza hofu katika jamii. Jambo hili limechangia kuleta taswira potofu kuhusu Uislamu, hasa kwa watu wasioifahamu dini hii kwa undani.

Ni muhimu kwa kila Muislamu kuelewa kwamba vitendo vya ugaidi havipaswi kuhusishwa na mafundisho sahihi ya Uislamu. Qur'ani Tukufu imeweka wazi umuhimu wa kuhifadhi uhai wa binadamu na kukataza dhuluma dhidi ya watu wasio na hatia.

Katika Suratul Al-Ma'idah, aya ya 32, Allah (S.W.) anasema:

"Mwenye kumuua mtu bila ya yeye kuua mtu au kufanya ufisadi katika ardhi, basi ni kama amewaua watu wote. Na mwenye kumuokoa mtu na mauti, basi ni kama amewaokoa watu wote." (Qur'ani 5:32).

Aya hii inadhihirisha uzito wa kuua bila haki na thamani kubwa ya kuokoa maisha ya binadamu. Hivyo, mtu anayemwaga damu za wasio na hatia hawezi kutumia jina la Uislamu kuficha uhalifu wake.

Pia, Uislamu unakataza kufanya uadui na kuvuka mipaka hata pale ambapo kuna tofauti au migogoro. Allah (S.W.) anasema katika Suratul Al-Baqarah, aya ya 190:

"Na piganeni katika njia ya Allah na wale wanaokupigeni, wala msivuke mipaka. Hakika Allah hawapendi warukao mipaka." (Qur'ani 2:190).

Mafundisho haya yanatufundisha kuwa hata katika mazingira ya mapambano, Uislamu haukubali kuvuka mipaka na kufanya uovu.

Aidha, Qur'ani inasisitiza umuhimu wa kutenda haki kwa watu wote, hata wale ambao hatuna mahusiano mazuri nao. Katika Suratul Al-Ma'idah, aya ya 8, Allah anasema:

"Wala kuchukiana na watu kusikuchukueni msifanye uadilifu. Fanyeni uadilifu, huko ndiko kunakokaribia zaidi uchamungu." (Qur'ani 5:8).

Hii ina maana kwamba tofauti za kidini, kisiasa au kijamii hazipaswi kuwa sababu ya kuwadhulumu wengine.

Changamoto nyingine ni baadhi ya makundi yenye misimamo mikali kutumia maandiko ya dini nje ya muktadha wake, kuwashawishi vijana na kuwajengea chuki dhidi ya jamii nyingine. Vijana wanapaswa kuwa waangalifu na ujumbe unaowataka kuua, kuchukia watu au kujiunga na makundi yanayohalalisha umwagaji damu kwa madai ya kutetea dini.

Allah (S.W.) anasema katika Suratul An-Nahl, aya ya 125:

"Lingania katika njia ya Mola wako kwa hekima na mawaidha mazuri, na jadiliana nao kwa namna iliyo bora." (Qur'ani 16:125).

Aya hii inaonyesha kuwa njia ya kueneza ujumbe wa Uislamu ni hekima, mawaidha mazuri na mazungumzo yenye heshima, si vitisho wala mauaji.

Kwa hiyo, Waislamu, viongozi wa dini, wazazi na walimu wana wajibu wa kuelimisha jamii kuhusu mafundisho sahihi ya Uislamu na kuwasaidia vijana kutambua propaganda za makundi ya kigaidi. Tusikubali dini yetu itumiwe kama kisingizio cha kueneza chuki na kuharibu maisha ya watu.

Hitimisho: Ugaidi hauwakilishi Uislamu, kwa sababu misingi ya Uislamu ni haki, huruma, uadilifu na kuhifadhi uhai. Kuutetea Uislamu ni kusimamia mafundisho yake sahihi, kulinda amani na kupinga kila aina ya dhuluma na umwagaji damu usio na haki.