HAKI ITAFUTWE NCHI IKIWA NA AMANI

                                  

Na Aaliyah N Mazhar

Katika jamii yoyote inayotaka kufikia maendeleo ya kweli, suala la haki ni msingi wa ustawi, umoja na utulivu. Haki inapopatikana, watu hufurahia maisha bila hofu; na haki inapokosekana, migogoro, chuki na uhasama hutawala. Kauli kuwa “Haki itafutwe nchi ikiwa na amani” inasisitiza wajibu wa jamii, serikali na watu binafsi kutatua changamoto kwa njia za utulivu badala ya kutumia ghasia. Hoja hii inaungwa mkono na mafundisho ya Qur’an Tukufu ambayo mara kwa mara inahimiza uadilifu, amani na kutafuta suluhu kwa busara.

Qur’an inasisitiza wazi kuwa Mungu ameamrisha uadilifu. Bila uadilifu, kutawala amani ni vigumu, kwani dhulma ni chanzo cha migogoro yote ya kijamii. “Hakika Mwenyezi Mungu anaamrisha uadilifu na ihsani…” Surat An-Nahl 16:90. Aya hii inaweka msingi wa fikra kwamba haki si hiari bali ni amri ya Mungu. Hivyo, kutafuta haki kwa utulivu ni kutekeleza maelekezo ya Kiungu.

 

Amani ndiyo msingi wa maisha. Qur’an inaitaja amani kama baraka ambayo binadamu anatakiwa aiweke na kuilinda. “Na ikiwa wawili katika waumini wanapigana, basi wapatanisheni…” Surat Al-Hujurat 49:9

Aya hii inaonyesha wajibu wa jamii kutafuta amani hata pale panapotokea migogoro. Msingi wake ni kupatanisha, sio kuongezea uhasama. Hili linatufundisha kuwa hata tunapotafuta haki, tusivunje amani ya nchi.

 

Historia inaonyesha kuwa migogoro mingi inapozidi, huathiri hata wale wasiokuwa na hatia. Qur’an inahimiza sana kushikamana na njia za amani ili kuepusha madhara kwa jamii nzima. “Na suluhu ni bora…” Surat An-Nisa 4:128.

 

Amani inatoa nafasi ya mazungumzo, majadiliano, uchunguzi wa kina, na ufumbuzi wa haki wa muda mrefu. Ghasia na vurugu mara nyingi hufanya suluhu iwe ngumu zaidi.

 

Umoja wa jamii ni jambo muhimu sana katika Qur’an. Hata katika tofauti, waislamu wanaelekezwa kuendeleza mshikamano. “Na shikamaneni kwa Kamba ya Mwenyezi Mungu nyote, wala msifarakiane…”  Surat Al-Imran 3:103. Hivyo, kudai au kutafuta haki hakupaswi kusababisha watu kugawanyika au kuchochea machafuko. Umoja ni nguvu ya kujenga, si kubomoa.

 

Kudai haki ni wajibu, lakini njia inayotumika ni muhimu. Qur’an inasisitiza kuwa katika kutoa ushahidi au kusimamia sheria, mtu asipindukie mipaka. “Enyi mlioamini! Kueni wasimamizi madhubuti kwa ajili ya Mwenyezi Mungu mkitoa ushahidi kwa uadilifu…” Surat Al-Maidah 5:8

Kauli “Haki itafutwe nchi ikiwa na amani” ina mizizi imara katika mafundisho ya Qur’an. Inaonyesha kuwa haki na amani si vitu vinavyopingana, bali vinakamilishana. Amani inatoa mazingira ya kutatua migogoro, huku haki ikihakikisha amani hiyo inadumu.

 

Kwa kuzingatia mafundisho ya Qur’an uadilifu, umoja, suluhu na upatanishi jamii yoyote inaweza kupata haki bila kuharibu amani, na amani bila kupuuza haki.