MATAMKO YA VIONGOZI WA DINI YA KIISLAMU NGUZO YA AMANI NA UTULIVU NCHINI

 

Na Yasir J. Nasir

Viongozi wa dini ya Kiislamu wamekuwa nguzo muhimu katika kujenga na kulinda utulivu wa taifa. Mara nyingi, matamko yao yamekuwa yakitoa mwongozo wa kuimarisha maadili, mshikamano na kuhakikisha kuwa jamii inafuata misingi ya amani kama ilivyoelekezwa na Qur’an. Katika kipindi ambacho mataifa mbalimbali yanakabiliwa na changamoto za kijamii na kisiasa, sauti za viongozi wa dini zimeendelea kuwa dira ya kuongoza wananchi kuelekea umoja na mwelekeo sahihi wa kitaifa.

 

Amani (salaam) ni sehemu ya utambulisho wa Uislamu. Qur’an na Sunna zimeweka misingi imara inayopiga marufuku vurugu, fitina na uharibifu. Mwenyezi Mungu anasema: “Wala msifanye uharibifu katika nchi baada ya kuwa imeshatengenezwa.” (Qur’an 7:56). Aya hii imekuwa rejea kuu kwa viongozi wa dini wanapohimiza kuachana na vitendo vinavyohatarisha amani ya taifa.

Viongozi wa Kiislamu mara nyingi wamehimiza kuwa Waislamu na watanzania kwa ujumla wathamini undugu na kuheshimiana. Huu ni wito unaolingana na Qur’an: “Hakika Waumini ni ndugu, basi patanishe ndugu zenu.” (Qur’an 49:10). Kupitia matamko yao, viongozi wa dini wamekuwa wakisisitiza kwamba mgawanyiko wa kisiasa, kikabila au kijamii unapaswa kusuluhishwa kwa njia ya busara na mazungumzo.

Viongozi wa dini pia hutumia majukwaa ya misikiti, makongamano na vyombo vya habari kukemea vikali matendo yanayoweza kuvuruga amani ya nchi. Hii ni Ishara kuwa Amani ndiyo msingi wa maendeleo ya taifa letu. Qur’an inasema: “Na msilazimishe ufisadi katika nchi; hakika Allah hawapendi wafisadi.” (Qur’an 28:77).

Kwa kutegemea aya hii, wanasema wazi kuwa kushiriki katika fujo, maandamano yasiyo na nidhamu, au uchochezi wa maneno ni kinyume na mafunzo ya Uislamu.

 

Mwelekeo wa taifa unaimarishwa na jamii yenye maadili. Viongozi wa Kiislamu hutumia Qur’an kuwafundisha wananchi umuhimu wa uadilifu, uaminifu, na kuchunga lugha. Allah anatuongoza: “Semeni neno lenye uadilifu.” (Qur’an 33:70). Kwa misingi hii, viongozi huwataka wananchi kuwa chanzo cha maneno na matendo ya kuleta utulivu, si kuharibu.

 

Matamko ya viongozi wengi yamekuwa yakihimiza ushirikiano kati ya wananchi na vyombo vya dola katika kulinda amani. Wanasisitiza kuwa kutii mamlaka ni sehemu ya maisha ya Kiislamu, ilimradi mamlaka hiyo haitoi amri ya kwenda kinyume na Qur’an: “Enyi mlioamini, tiini Mwenyezi Mungu, na mt’iini Mtume, na wenye mamlaka kati yenu.” (Qur’an 4:59). Hivyo, viongozi hutoa msimamo wa kuunga mkono hatua za kiserikali zinazolenga kuimarisha mwelekeo wa kitaifa.

 

Matamko ya viongozi wetu, huwakumbusha wananchi kwamba amani ni baraka ya kiroho na ya kijamii. Bila amani, hakuna maendeleo. Vile vile Kwa kukemea fitina na uchochezi, viongozi hupunguza uwezekano wa migogoro kukua na kuleta madhara makubwa.

Katika nyakati za misukosuko au mijadala mikubwa ya kitaifa, matamko ya viongozi wa dini hutoa utulivu wa kifikra kwa wananchi.

Viongozi wa dini ya Kiislamu wamekuwa na jukumu muhimu katika kuimarisha amani na kuelekeza taifa kwenye mwelekeo sahihi. Kupitia matamko yao, wanatumia Qur’an kama mwongozo wa kuhimiza umoja, kutetea amani, kukataa uharibifu, na kuhimiza maadili mema. Matamko haya huchangia kwa kiasi kikubwa kujenga taifa lenye utulivu, mshikamano na maadili yanayokubalika mbele ya Mwenyezi Mungu.

 

Kwa kuendelea kusikiliza na kutekeleza ushauri wa viongozi wa dini, tunaweza kuijenga Tanzania yenye mwelekeo thabiti na maendeleo ya kudumu.