NCHI HII NI YETU SOTE, EWE MWISLAMU USIKUBALI KUPOTEZA AMANI TULIYONAYO

 

Na Amina A. Juma

Amani ni neema ya thamani kubwa ambayo mara nyingi watu huihisi baada ya kuipoteza. Tanzania imejengeka katika misingi ya utulivu, mshikamano na kuheshimiana licha ya tofauti za dini, kabila na mitazamo ya kisiasa. Kwa Muislamu, jukumu la kutunza amani si suala la hiari, bali ni amri ya Mwenyezi Mungu. Qur’an imeweka wazi kwamba uharibifu, fitina na vurugu ni mambo yanayokataliwa kabisa katika Uislamu.

Kwa msingi huo, kila Muislamu anapaswa kuwa mstari wa mbele kuhakikisha kuwa taifa linaendelea kuwa mahali salama kwa vizazi vya leo na kesho.

Qur’an inatuhimiza kutunza ardhi, kulinda utulivu na kuishi kwa amani. Mwenyezi Mungu anasema: “Wala msifanye uharibifu katika nchi baada ya kuwa imeshatengenezwa.” (Qur’an 7:56)

 

Aya hii inaonyesha wazi kwamba Muislamu anapaswa kuwa mhifadhi wa utengenezaji wa nchi, si chanzo cha uharibifu au machafuko. Katika taifa letu, kufanya vitendo vinavyoleta hofu, chuki, au migogoro ni kwenda kinyume na agizo la Mwenyezi Mungu.

 

 “NCHI HII NI YETU SOTE” kauli hii inamaana kubwa kimtazamo kwa waislamu wote wa kitanzania waliyopo nchini ama nje ya nchi. Kwa maana hiyo basi kila mwislamu anawajibu wa kuishi kwa umoja na kuheshimiana. Uislamu unafundisha kuwa tofauti ni sehemu ya mpango wa Mwenyezi Mungu. Katika Qur’an tunafundishwa:

“Enyi watu! Hakika Sisi Tumekuumbeni kutokana na mwanamume na mwanamke, na Tumekujaalieni kuwa mataifa na makabila ili mpate kutambuana.” (Qur’an 49:13)

 

Kwa msingi huo, kila Muislamu anapaswa kutambua kuwa Tanzania ni ya wote Wakristo, Waislamu na hata wale wasio na dini na amani ni jukumu la kila mmoja.

Matamshi ya kuchochea vurugu, kugawa jamii au kuunda makundi ya uhasama yanakatazwa katika Qur’an. Allah anatuamuru: “Semeni neno lenye uadilifu.” (Qur’an 33:70)

 

Hivyo, Muislamu hapaswi kuruhusu maneno ya watu katika mitandao ya kijamii, au vikundi fulani kumshawishi kushiriki katika mambo yanayoweza kuvunja amani. Ni wajibu wetu kutambua kuwa Maneno hujenga na maneno huvunja.

 

Amani inapopotea, athari zake huenda moja kwa moja kwa wananchi, na hasa familia. Baadhi ya athari hizo ni Kuvurugika kwa maisha ya kila siku ambapo Shule kufungwa, biashara kudorora, na shughuli muhimu za kijamii kusimama, Kupotea kwa riziki Qur’an inatukumbusha kwamba Allah hawapendi wanaoleta ufisadi unaoharibu riziki: “Na msilazimishe ufisadi katika nchi.” (Qur’an 28:77)

Wito Kwa Muislamu ni kuliinda Amani, Jenga Taifa lililo imara na umoja. Muislamu anapaswa kuwa chanzo cha mazungumzo ya hekima, si fitina. Qur’an inasema: “Na waseme yaliyo mema.” (Qur’an 2:83)

Kutiia mamlaka na kuheshimu sheria za nchi ni sehemu ya mafundisho ya Uislamu, ilimradi hazipingani na amri za Allah. Vijana ndiyo nguvu ya taifa. Wakiweka akili na nguvu zao katika kujenga, taifa hupiga hatua; wakishawishiwa kuvunja amani, taifa huzama katika madhara yasiyorekebishika kirahisi.

Tanzania ni nyumba yetu sote bila kujali dini, kabila au historia. Kama Waislamu, tunao wajibu wa kudumisha amani tuliyobarikiwa nayo. Qur’an imetuhimiza kuwa watu wa utulivu, watu wa uzalishaji na watu wa ujenzi, si uharibifu.

Ewe Muislamu, ushawishike kupoteza amani tuliyonayo; iwe ndiyo dhamana yako kwa Mwenyezi Mungu na kwa taifa lako. Amani ikilindwa leo, vizazi vijavyo vitashuhudia baraka zake.