MADHARA YA UVUNJIFU WA AMANI NA ATHARI KWA FAMILIA ZA KIISLAMU

 

Amani ni nguzo muhimu katika maisha ya Muislamu na msingi wa ustawi wa jamii. Qur’an imeelekeza mara nyingi juu ya umuhimu wa utulivu, mshikamano, subira na kujiepusha na vitendo vyovyote vinavyosababisha vurugu au kisasi. Jamii isiyo na amani hupoteza mwelekeo, na madhara hayo huanzia katika kitengo muhimu zaidi cha familia.

Katika familia za Kiislamu, amani ni msingi wa malezi, ibada, na ustawi wa maadili. Wakati kunapotokea uvunjifu wa amani iwe kwa migogoro ya kisiasa, vurugu za mitaani, chuki za kikabila, au mizozo ya kijamii au familia huwa kundi la kwanza kuhisi athari. Mwenyezi Mungu ametuhimiza kujiepusha na kila jambo linaloweza kuharibu amani kwa kusema:

“Wala msifanye uharibifu katika nchi baada ya kuwa imeshatengenezwa.” (Qur’an 7:56). Aya hii inaonyesha kuwa Muislamu anapaswa kuwa mtetezi wa amani, si chanzo cha vurugu.  

Uvunjifu wa Amani katika nchi, unaleta athari za moja kwa moja katika familia za Kiislamu, mfano wa Athari hizo ni kama Msongo wa mawazo na kuathirika kwa afya ya kisaikolojia katika familia. Wakati kuna vurugu au wasiwasi katika jamii, wanawake, watoto na wazee hukumbwa na hofu na msongo wa mawazo. Qur’an inatuthibitishia kuwa utulivu ni neema kutoka kwa Allah.

“Na atakayemtegemea Mwenyezi Mungu, basi Yeye humtosheleza.”

(Qur’an 65:3). Aya hii inaeleza kuwa  kutokuwepo kwa utulivu kunawafanya wanajamii kujihisi hawana pa kukimbilia zaidi ya kutegemea subira na dua.

 

Pia uvunjifu wa amani nchini unasababisha kuvurugika kwa malezi ya Watoto. Mazingira yenye vurugu huzuia malezi bora, huathiri tabia na kukatisha mitaala ya elimu. Qur’an inawakumbusha wazazi jukumu la kulea watoto katika misingi ya amani.  “Enyi mlioamini, jilindeni nafsi zenu na ahli zenu na Moto…” (Qur’an 66:6). Bila amani, wazazi wanashindwa kutimiza jukumu hili ipasavyo. 

Vurugu na uvunjifu wa amani husababisha kuporomoka kwa uchumi wa familia. Uvunjifu wa amani mara nyingi huambatana na kupotea kwa ajira, biashara kufungwa, au kupungua kwa kipato. Qur’an inatuonya dhidi ya matendo yanayoharibu riziki.  “Na msilazimishe ufisadi katika nchi; hakika Mwenyezi Mungu hawapendi wafisadi.” (Qur’an 28:77). Ufanyaji wa vurugu unaathiri moja kwa moja riziki ya familia nzima.

 

Amani ni sharti la ibada kufanyika kwa utulivu. Machafuko hupelekea watu kushindwa kuswali kwa amani, kuhudhuria misikiti, au kukaa pamoja katika ibada za kijamii kama dhikri na elimu. Allah anasema: “Na masikiti ni ya Mwenyezi Mungu, basi msimuabudu yeyote pamoja na Yeye.” (Qur’an 72:18). Endapo misikiti haiwezi kutumika kwa sababu ya hofu, basi maisha ya kiroho hupungua.

 

Vurugu na migogoro hupandikiza chuki na uhasama. Kugawanyika kwa jamii na kupotea kwa undugu Qur’an inatuamrisha kuleta umoja: “Hakika Waumini ni ndugu, basi patanishe ndugu zenu.” (Qur’an 49:10). Pasipo jitihada za kuleta amani, familia na ukoo hugawanyika.

 

Wajibu wa Familia za Kiislamu Kuhifadhi Amani na kutokuruhusu vitendo vyovyote vya uvunjifu wa amani wala vinavyohatarisha usalama wanchi. Ni vyema kuwafundisha vijana kuhusu maadili ya subira na msamaha, kwani Subira ni kinga dhidi ya migogoro. Allah anasema: “Hakika Mwenyezi Mungu yu pamoja na wenye subira.” (Qur’an 8:46)

 

Uvunjifu wa amani ni tishio kubwa kwa ustawi wa familia za Kiislamu. Unaharibu uchumi, ibada, afya ya akili, na muungano wa familia. Qur’an imesisitiza mara nyingi juu ya kulinda amani na kuzuia uharibifu katika jamii. Familia za Kiislamu zinapaswa kuwa mstari wa mbele katika kutetea utulivu, kuhubiri mshikamano, na kufundisha watoto thamani ya kuishi kwa amani. Amani ni baraka ni wajibu wa kila mwisamu tuilinde na kuitunza tukiilinda, tunalinda vizazi vyetu.

Na Mwandishi wetu.