WAJIBU WA VIJANA WA KIISLAM KUEPUKA KUJIHUSISHA NA UVUNJIFU WA AMANI NCHINI

 

UISLAM ni dini ya amani, utulivu na ustawi wa jamii. Vijana, kama nguvu muhimu ya taifa, wana nafasi kubwa katika kuilinda amani na kuzuia matendo yote yanayoweza kuleta fitna, vurugu au machafuko. Qur’an Tukufu imeweka misingi thabiti kuhusu ulazima wa waumini, hasa vijana, kujiepusha na uharibifu na badala yake kuwa ni chachu ya utulivu na umoja.

 

Hakuna dini au dhehebu lolote katika maandiko ya Biblia au Qur’an tukufu imehalalisha vijana kushiriki katika uvunjifu wa amani au Uharibifu. Qur’an imekataza vikali vitendo vya uharibifu na vurugu katika jamii.

 

“Na yuko miongoni mwa watu ambaye juhudi yake duniani ni kuleta uharibifu na kuharibu mimea na mifugo; na Allah hampendi mharibifu.” (Qur’an 2:205)

 

Aya hii inaweka wazi kuwa Allah hawapendi wanaosababisha uharibifu wa aina yoyote. Vijana wa Kiislam wanapaswa kujiweka mbali na machafuko, fujo, maandamano yenye madhara au propaganda zinazoleta migawanyiko katika nchi.

 

Yapo baaadhi ya makundi ya wanaharakati katika mitandao ya kijamiii, wanaotumiwa na Mataifa ya nje kuweza kuvuruga amani ya nchi. Mara kadhaa mataifa makubwa hasa yanapoona nchi ina raslimali ambazo wao wanaweza kunufakia nazo hutengeneza makundi ya wanaharakati kwa kuwalipa fedha nyingi ili kuweza kuchochea fitna kwa jamii hususan vijana lengo ikiwa ni kusababisha machafuko katika nchi husika na wao kutumia machafuko hayo kujinufaisha.

 

Fitna katika Qur’an imeelezwa kuwa ni uovu mkubwa unaobomoa jamii. Katika Aya ya Qur’an       “Fitna ni mbaya zaidi kuliko kuua.”(Qur’an 2:191).

 

Fitna inajumuisha uchochezi wa maneno, kueneza taarifa za uongo, kusababisha vurugu, uasi au kugawanya wananchi. Vijana wanapaswa kuwa waangalifu sana katika mitandao ya kijamii na kwenye mijumuiko ili kuepusha kuwa chanzo cha fitna.

 

UISLAM unaamrisha utiifu kwa Allah, Mtume na viongozi halali wa jamii ili kuzuia machafuko na uasi. Aya ya Qur’an;         “Enyi mlioamini! Mtiini Allah, na mtiini Mtume, na wenye mamlaka katika nyinyi…” (Qur’an 4:59).

 

Aya hii inawaongoza vijana kutotumia hasira au misukumo ya muda kufanya vitendo vinavyoivuruga nchi. Badala yake, masuala ya malalamiko yashughulikiwe kwa njia za kisheria, busara na mazungumzo.

 

 

Vijana wa kiislam wanapaswa kuwa mabalozi wa umoja na upatanisho. Katika Aya ya Qur’an;       “Waumini ni ndugu, basi patanisheni baina ya ndugu zenu…” (Qur’an 49:10)

 

Aya hii inawaamuru vijana wa Kiislam kuwa watu wa kuleta utulivu, kuwashauri wenzao kwa hekima, na kuzuia mijadala au makundi yanayoweza kuleta mgawanyiko.

 

Kijana wa kiislam anatakiwa awe mnyeyekevu na kufuata taratibu na sheria za nchi ikiwemo kutokutumia maneno yanayoweza kuchochea vurugu na uvunjifu wa amani. Maneno yanaweza kuinua nchi au kuibomoa, Uislam umeweka mipaka ya maadili katika mawasiliano.

 

“Wala watu wasichekezane (wakadharauliana)… Wala msibezeane kwa majina mabaya.” (Qur’an 49:11)

 

Aya hii inawaonya vijana juu ya matumizi mabaya ya maneno yanayoweza kuchochea chuki na kuhatarisha amani.

 

UISLAM umeweka jukumu kwa vijana kuwa waangalizi wa maadili ya jamii. “Na liwe miongoni mwenu kundi linaloamrisha mema na kukataza maovu…” (Qur’an 3:104). Kutokana na aya hii, vijana wanapaswa kupinga waziwazi ajenda za uharibifu na badala yake watetee amani na kuelimisha wenzao kuhusu thamani ya utulivu wa nchi.

UISLAM unasisitiza uadilifu na kukataa dhuluma, mihemuko na jeuri zinazoweza kuvuruga nchi.

“Hakika Allah anaamrisha uadilifu, ihsani… na anakataza mambo maovu, ujeuri na dhuluma.” (Qur’an 16:90)

Aya hii ni muongozo muhimu kwa vijana kuwa watulivu, wenye subira na wanaotatua matatizo kwa amani bila kuchukua sheria mkononi.

 

Wito wangu kwa Vijana wa Kiislam, Qur’an inawapa vijana wa Kiislam nafasi na wajibu mkubwa wa kulinda amani ya nchi. Kujiepusha na kuvuruga utulivu, kukataa fitna, kutumia lugha yenye hekima, kutii viongozi na kuunga mkono juhudi za umoja ni misingi ya Kiislam inayojenga jamii yenye usalama na maendeleo.

 

Kwa kuzingatia aya hizi, kijana Mwislam ni lazima awe mfano bora wa amani, mshauri wa wema, mpatanishi na mlinzi wa utulivu wa nchi.

 

Na  Mwandishi wetu