TAHADHARI KWA VIJANA WA KITANZANIA, TAMBUA MIZIZI YA MATATIZO NA KULINDA AMANI KWA MUONGOZO WA UISLAMU

Katika misingi ya Uislamu, amani, umoja na ujenzi wa jamii ndiyo mizizi ya ustaarabu. Qur’ani inatukumbusha kutafakari kabla ya kuchukua hatua na kutafiti kabla ya kuamini habari (Qur’an 49:6). Leo, Afrika inakabiliwa na changamoto nyingi za kijamii, kisiasa, kiuchumi na kimazingira. Mara nyingi migogoro hii huonekana kama vile imeibuka ghafla, ilhali nyuma yake kuna sababu, mipango na wanaonufaika.

 

Kwa muktadha wa Tanzania, na Afrika kwa ujumla, vijana wanatakiwa waamke na kuelewa mazingira yanayozunguka bara lao, huku wakilinda thamani kubwa tulizopewa: AMANI, UTULIVU na UMOJA.

 

UISLAMU NA WAZO LA KUCHUNGUZA CHANZO CHA MIGOGORO

Katika Qur’an, Allah anatuamrisha: “Na msifanye uharibifu katika ardhi baada ya kuwa imekwisha kutengenezwa.” (Qur’an 7:56).

 

Uharibifu haubaki kuwa tu uvunjifu wa majengo au mali, bali pia kuvuruga umoja, kuharibu amani, kupandikiza chuki, kueneza tuhuma zisizo na uhakika.

Uislamu unafundisha kuwa matatizo haya hayaji bila sababu. Kuna mikono, kuna mawazo, kuna maslahi kutoka mataifa makubwa na hutumia baadhi ya wanaharakati kufanikisha mipango yao.

 

Aidha, Katika historia ya Afrika, mara nyingi migogoro iliyokuwa mingi hutengenezwa, imeelekezwa na imetumiwa na wanufaika wachache na kwa maslahi ya mataifa yenye nguvu kwa maslahi ya nchi au mataifa yao.

 

KWA UPANDE WA TANZANIA KATIKA MTAZAMO WA KIISLAMU

 

Tanzania imebarikiwa kuwa nchi yenye utulivu wa kijamii na mchanganyiko wa watu wa dini mbalimbali wanaoishi pamoja kwa heshima. Hii ni neema ambayo Qur’an inatukumbusha tuilinde, kama anavyosema Allah:

“Neema ya Mwenyezi Mungu haibadiliki kwa watu mpaka wabadili yaliyomo katika nafsi zao.” (Qur’an 13:11).

 

Hii inamaanisha kuwa, Amani ikivunjika, hatari, majuto na machafuko yanaweza kuwa makubwa kuliko tulivyowahi kufikiria. Ni wajibu wa vijana, wazazi, viongozi wa dini na jamii kujiuliza maswali, kutafakari habari,         na kutokubali kutumiwa vibaya kwa maslahi ya mabeberu.

 USHAURI KWA VIJANA NA WANAMITANDAO: TAHADHARI YA KIISLAMU

Kulingana na mabadiliko ya teknolojia hivi sasa chanzo kikuu cha Vijana wengi leo kupata Habari ni kutoka kwenye mitandao ya kijamii mbalimbali iliyopo hivi sasa.

 

Lakini Uislamu unatukumbusha kuwa: “Enyi mlioamini! Kama fasiki akija kwenu na habari, basi fanyeni utafiti…” (Qur’an 49:6). Hii ni tahadhari ya moja kwa moja.

 

Leo kuna taarifa zinazopikwa katika mitandao ya kijamii, propaganda zinazofadhiliwa, sauti zinazotumiwa, simulizi zinazoundwa, na watu wanaopewa umaarufu kwa malengo maalum na hao wanao watumia kwa kuwafadhili kutekeleza malengo yao. Lakini vijana wetu hivi sasa wanaweza kutumiwa bila kujua.

 

 SOMO KUTOKA MATAIFA MENGINE – KWA MTAZAMO WA UISLAMU

 

Historia ya ulimwengu imetupa ibra nyingi, Walivyosema wanazuoni: “Muislamu ni yule anayejifunza kutokana na makosa ya wenzake kabla hajayafanya.”  Tukiyatazama maeneo kama Libya, Congo, Sudan, Afghanistan. Tunaona alama moja mara nyingi machafuko yakiingia, walioathirika zaidi ni raia, hasa VIJANA.

 

Katika Uislamu, kuzuia madhara kabla hayajatokea ni wajibu mkubwa kuliko kutibu madhara yaliyotokea.

 

NANI ANANUFAIKA? – JAWABU LA KIISLAMU

 

Uislamu unatilia mkazo kujiuliza maswali haya kabla ya kufuata mkumbo wa wanaharakati wanaotumiwa kushawishi, “Kwa nini?”, “Kwa manufaa ya nani?” “Nani ataumia?”. Kwa sababu mara nyingi    mali ya nchi inapotea, uchumi unaporomoka,     taasisi zinadhoofika, vijana wanatatizika, dini inapotoshwa na jamii inagawanyika. Mara zote wanufaika wa machafuko hayo  huwa si wananchi wa kawaida.

 

WITO KWA VIJANA WA KIISLAMU NA TAIFA

 

Vijana wanaoshawishiwa na wanaharakati wanapaswa kufahamu kuwa kujitafakari na kufikiri kwa busara, kujifunza historia ya nchi yetu,  kuchambua vyanzo vya taarifa, kuilinda amani, kutetea umoja, kuheshimu viongozi wa dini na wazee, kutumia lugha yenye staha na kufahamu muelekeo wa maisha yako.

 

Kwa sababu Mtume ﷺ alisema: “Mja hatakuwa muislamu kamili mpaka apende kwa mwenzake kile anachokipenda kwa nafsi yake.”  Muislamu anayependa amani kwa familia yake, awe anaitakia amani kwa taifa lake pia.

 

Amani ni neema bora kuliko dhahabu na mali, Ni amana kutoka kwa Allah, Ni zawadi ya vizazi vilivyotutangulia, Ni urithi tunaotakiwa kuwaachia watoto wetu.

 

Kwa Vijana wa Tanzania na Afrika, tujiulize kabla ya kusambaza taarifa, tuchunguze kabla ya kuamini, tuhoji mbele ya nafsi zetu, tuthamini amani tuliyonayo      na tusikubali kutumiwa katika vurugu zisizotunufaisha.

 

Kwa mwanga wa Qur’an na Sunna, tuendelee kuwa walinzi wa umoja, usalama na utulivu wa nchi yetu.

 

Na Mwandishi Wetu.