Na Amina H Juma 

As-salamu alaykum wa raḥmatullahi wa barakat!

Uislamu ni dini ya huruma, wema na mshikamano. Kutendeana mema si jambo la hiari tu, bali ni ibada inayomkaribisha mja kwa Mwenyezi Mungu. Mtu anapomfanyia mwenzake wema kwa ajili ya Allah, hupata malipo makubwa duniani na Akhera. Qur’ani Tukufu na Sunnah zimelisisitiza jambo hili kwa namna ya wazi na yenye kuhamasisha.

Kutenda Mema ni Amri ya Mwenyezi Mungu, Mwenyezi Mungu anasema: “Hakika Mwenyezi Mungu anaamrisha uadilifu na ihsani (wema)…” Surat An-Nahl (16:90)

Aya hii inaonesha kuwa wema si tu tabia njema, bali ni amri ya moja kwa moja kutoka kwa Mwenyezi Mungu. Ihsani ni kufanya mema kwa ubora na kwa ikhlasi.

Mwenyezi Mungu Huwalipa Wafanyao Mema, Mwenyezi Mungu anasema: “Hakika Mwenyezi Mungu hapotezi malipo ya wafanyao mema.” Surat At-Tawbah (9:120)

Na pia anasema: “Je, malipo ya ihsani si ihsani?” Surat Ar-Rahman (55:60). Hii ni bishara njema kuwa kila wema unaofanywa kwa ajili ya Allah haulipwi kwa hasara, bali hurudishwa kwa namna bora zaidi.

Wema kwa Watu ni Njia ya Kupata Rehema za Allah, Mtume Muhammad (S.A.W.) amesema: “Wenye huruma watahurumiwa na Mwingi wa Rehema. Wahurumieni walioko ardhini, atakuhurumieni Aliye mbinguni.” Hadithi Sahihi: Abu Dawud na At-Tirmidhiy

Hivyo, kumsaidia mwenzako ni sababu ya kupata rehema za Mwenyezi Mungu.

Kumsaidia Mwenzako ni Sababu ya Kusaidiwa na Allah, Mtume (S.A.W.) amesema: Mwenyezi Mungu yuko katika msaada wa mja wake maadamu mja yuko katika msaada wa ndugu yake.” Sahih Muslim

Hadithi hii inaonesha kuwa unapomsaidia mwenye shida, unapomfariji mwenye huzuni, unapomnyanyua aliyeanguka,
Allah naye hukusaidia katika shida zako.

Kuondoa Dhiki kwa Mwenzako ni Kuondolewa Dhiki Siku ya Kiyama, Mtume (S.A.W.) amesema: “Yeyote atakayemwondolea Muumini dhiki katika dhiki za dunia, Mwenyezi Mungu atamwondolea dhiki katika dhiki za Siku ya Kiyama.” Sahih Muslim. Hii ni fadhila kubwa: wema wa dunia unaleta ulinzi wa Akhera.

Sadaka na Wema Huongeza Baraka, Mwenyezi Mungu anasema: “Mfano wa wanaotoa mali zao katika njia ya Mwenyezi Mungu ni kama chembe iliyotoa masuke saba, kila suke lina punje mia…” Surat Al-Baqarah (2:261). Aya hii inaonesha kuwa malipo ya wema huongezwa mara nyingi zaidi kuliko tulivyotoa.

Tabasamu ni Sadaka, Mtume Muhammad (S.A.W.) amesema: “Tabasamu lako kwa ndugu yako ni sadaka.” Hadithi Hasan Sahihi: At-Tirmidhiy. Hii inaonesha kuwa hata wema mdogo una thamani kubwa mbele ya Allah.

Watu Bora ni Wenye Manufaa kwa Wengine, Mtume (S.A.W.) amesema: “Watu bora zaidi ni wenye manufaa zaidi kwa watu.” Hadithi Hasan

Hivyo, hadhi ya mtu mbele ya Allah hupimwa kwa kiwango cha manufaa yake kwa wengine.

Wema Huleta Amani ya Moyo, Mwenyezi Mungu anasema: “Hakika kwa kumkumbuka Mwenyezi Mungu nyoyo hutulia.” Surat Ar-Ra’d (13:28). Kutenda mema kwa ajili ya Allah ni aina ya dhikri kwa vitendo, na huleta utulivu wa nafsi na furaha ya ndani.

Kutendea mema binadamu wenzetu ni amri ya Mwenyezi Mungu, sababu ya kupata rehema na msaada Wake, njia ya kusamehewa madhambi na daraja ya juu Siku ya Kiyama. Hakuna wema unaopotea mbele ya Allah. Hata neno jema, tabasamu, au msaada mdogo, vinaandikwa na kulipwa kwa ukamilifu.

Omba Dua hii; Ewe Mwenyezi Mungu! Tufanye miongoni mwa wenye kutenda mema, wenye kusaidia waja wako, na utujaalie tufaidike na rehema zako duniani na Akhera.
Aamiyn.

MWISHO