MAAJABU YA NGAMIA NA MAGONJWA ANAYOTIBU

 

Na Fadil J Hasib 

As-salamu alaykum wa raḥmatullahi wa barakatuh!

Ngamia ni miongoni mwa viumbe wa ajabu kabisa walioumbwa na Mwenyezi Mungu (Subhanahu wa Ta‘ala). Ameumba mnyama huyu kwa hekima kubwa, akamfanya awe na manufaa mengi kwa mwanadamu: chakula, kinywaji, usafiri na hata tiba. Uislamu umetilia mkazo mkubwa kutafakari maumbile ya ngamia na faida zake, kama ishara ya qudra na hekima ya Muumba wetu.

Ngamia katika qur’ani tukufu, Mwenyezi Mungu anatualika kutafakari juu ya umbile la ngamia kwa kusema: “Je, hawaangalii ngamia jinsi alivyoumbwa?” (Surat Al-Ghaashiyah: 17)

Aya hii inaonyesha wazi kuwa ngamia si mnyama wa kawaida, bali ni kiumbe chenye maajabu mengi yanayopaswa kufanyiwa tafakuri. Uwezo wake wa kustahimili kiu, joto kali, kubeba mizigo mizito na kuishi jangwani ni dalili ya hekima ya Mwenyezi Mungu.

Miongoni mwa maajabu makubwa ya ngamia ni maziwa yake, ambayo yamekuwa yakitumiwa tangu zamani kama tiba ya magonjwa mbalimbali. Mtume Muhammad (S.A.W) alielekeza matumizi ya maziwa ya ngamia kwa tiba, kama inavyopokewa katika Hadithi sahihi:

Imepokelewa kutoka kwa Anas bin Malik (R.A) kwamba watu fulani waliumwa, Mtume (S.A.W) akawaamuru: “Wanyweni maziwa ya ngamia na mkojo wake.” (Imepokewa na Al-Bukhari na Muslim)

Hadithi hii inaonesha kuwa Mtume (S.A.W) alitumia tiba kwa njia ya maumbile (Tiba Nabawi), akielekeza matumizi ya kile alichokiumba Mwenyezi Mungu kama sababu ya kuponya.

Magonjwa yanayotibiwa (kwa maarifa ya jadi na tiba nabawi), Kwa mujibu wa elimu ya tiba ya jadi na baadhi ya utafiti wa kisasa, maziwa ya ngamia yamekuwa yakihusishwa na kusaidia katika Magonjwa ya tumbo kama kuharisha na matatizo ya mmeng’enyo wa chakula, Kuimarisha kinga ya mwili kutokana na virutubisho vyake, Magonjwa ya ini kwa mujibu wa tiba za jadi, Udhaifu wa mwili na upungufu wa damu na Kisukari baadhi ya tafiti zinaonesha husaidia kudhibiti kiwango cha sukari.

Hata hivyo, ni muhimu kufahamu kuwa Uislamu unahimiza kuchukua tiba huku tukimtegemea Mwenyezi Mungu kama Mponyaji wa kweli.

Nyama ya ngamia pia ni miongoni mwa vyakula halali na vyenye faida. Ina protini nyingi, mafuta kidogo ikilinganishwa na nyama nyingine, na husaidia kuimarisha nguvu za mwili. Mtume Muhammad (S.A.W) na Maswahaba walikuwa wakila nyama ya ngamia, jambo linaloonesha uhalali na manufaa yake.

Mafunzo ya kiimani’ Kupitia ngamia, Muislamu anapaswa kujifunza Kutambua uwezo na hekima ya Mwenyezi Mungu, Kutumia neema alizopewa kwa shukrani na Kufahamu kuwa tiba zote zinatoka kwa Allah, na dawa ni sababu tu

Mtume Muhammad (S.A.W) amesema “Hakika Mwenyezi Mungu hakuleta ugonjwa ila ameleta pia dawa yake.” (Imepokewa na Al-Bukhari)

Ngamia ni mnyama mwenye maajabu makubwa, aliyejaa ishara za qudra ya Mwenyezi Mungu na manufaa kwa mwanadamu. Kupitia Qur’ani Tukufu na Sunna ya Mtume Muhammad (S.A.W), tunajifunza kuwa kutumia neema hizi kwa njia sahihi ni sehemu ya ibada. Ni wajibu wetu kutafakari, kushukuru na kutumia maarifa haya kwa manufaa ya afya ya mwili na imani ya moyo.

 

MWISHO