UMUHIMU WA KUTUNZA AMANI NA UTULIVU KATIKA JAMII NA NCHI KWA UJUMLA

 

MWENYEZI MUNGU muumba wa mbingu na ardhi ndiye ambaye anatakiwa kushukuriwa kwa haki kwa kuendelea kutubariki kwa uzima na afya.

Katika  jamii yeyote na  Nchi kwa ujumla  ili kuwepo kwa  maendeleo  ni muhimu  kwa kila mmoja kuhakikisha  kuna Amani na utulivu. Kwa kuwa  jamii  inaundwa na binadamu na uwepo wa binadamu huyo ni muhimu,  hivyo ni lazima kuwepo kwa azma ya dhati kwa kila mmoja kuhakikisha  kuna  amani  na utulivu  katika jamii  inayomzunguka  ili  kuweza kuzuia machafuko na uvunjifu  wa amani unaoweza kutokea katika jamii.

Jamii  zote zimejengwa na binadamu  wenye  itikadi, Imani, fikra  na mtazamo usiofanana katika nyanja  za siasa, dini na kabila. Kadhalika, hali hiyo ipo   kwa mwanadamu kutokana na maumbile ya mwanadamu mwenyewe.

Hata hivyo katika maandiko mbalimbali matukufu  ya Mwenyezi Mungu (S.W) aya ya 1 katika Surat  al Nisai  imeeleza kuwa “kwa hakika sisi  tumekuumbeni kutokana na  mwanaume mmoja na mwanamke mmoja na tukakujalieni   mataifa na makabila mbalimbali ili mjuane ,hakika ubora wenu mbele ya Allah ni  yule mchaji zaidi”.

Aya hii imehimiza umoja na upendo   miongoni mwa wanadamu ambapo itapelekea kuwepo kwa  hali ya  amani na utulivu   katika jamii na Taifa kwa ujumla.

Utulivu na amani  ni muhimu katika kuwezesha maendeleo  endelevu  ila ikiwa kinyume chake kama  ilivyo kuwepo  kwa hali ya  ghasia   itakuwa ni moja  ya vikwazo  vikubwa  vya  maendeleo hayo. Itakuwa ni jambo la kutia moyo na muhimu   endapo mapigano na vita vitapungua katika dunia kwakuwa  uwepo wa  migogoro na vita husababisha maafa  makubwa yakiwemo vifo na ulemavu kwa watu  vile inapokosa amani  na utulivu   migogoro na fujo ndio hushika hatamu na jamii huporomoka  katika kila  nyanja  mbele ya jamii nyingine.

Katika aya ya 46 Surat  al Anfal  Mwenyezi Mungu ameeleza kuwa   “ Wala ,msizozane , msigombane  msije  mkaharibikiwa  na  kupoteza  nguvu zenu , na  vumilieni  mstahimilieni  bila  shaka Mwenyezi Mungu yupo pamoja  na wanaovumilia” aya hii bado inahimiza umuhimu wa kudumisha Amani na utulivu pamoja na kuwa na uvumilivu.

Vile vile  ili kufikia  lengo kuu la kutokemeza umaskini    kutabakia ndoto  kwa  wengi   iwapo jamii haitashirikiana  kumaliza   migogoro  na  ukosefu wa utulivu  , ikijumuisha   uwepo  kwa uongozi bora , utawala  wa kisheria, haki za binadamu  na haki ya maendeleo kwa wote.

Katika muktadha wa dini, uadilifu , uvumilivu huwa  unanyanyua utu wa mtu mbele ya watu wengine , kabila , dini , ukoo na Taifa kwa ujumla . Pia dini inasisitiza tabia njema na inatukataza   kuwafanyia watu wengine matendo maovu ikiwemo kuwadharau, kuwanyanyasa, sababu hali hiyo itasaidia kudumisha amani  na utulivu kwa jamii nzima.

Mbali na dini kuhimiza kudumisha amani na utulivu vile vile kwa upande wa   Nchi husika kupitia katiba  zao zimetoa  miongozo kwa Serikali, Taasisi na Vyama katika kudumisha na kuteteta  haki  na  usawa kwa binadamu wote, hatua hii  itasaidia kuhimiza kila mmoja kutimiza wajibu wake katika kudumisha na kulinda amani na utulivu katika jamii aliyopo.

Amani  na utulivu katika jamii na Nchi kwa ujumla ni tunu ambayo inatakiwa kulindwa  kwa namna yeyote ile , hivyo  ili  kuyafikia mafanikio ya kuwa na amani na utulivu ni lazima kila mmoja kutekeleza wajibu wake mahali pale alipo kwa maana athari ya uvunjifu wa amani ni kubwa na hatari kwa mustakabali wa jamii na Taifa kwa ujumla .

Wito wangu kwa watanzania na dunia kwa ujumla ni muhimu kuchukuliwa hatua kali kwa mtu au kikundi chochote cha watu ambao wataonekana kwa makusudi wanataka kuvuruga amani na utulivu katika jamii na Nchi, tushirikiane kulinda amani  na utulivu wa Nchi yetu.